Catégories
Non classé

Lilia Ben Romdhane

8 mai 2020

ستانست نغزر للشارع مالشباك، و في مخي كل يوم حكاية، قلت كي نخرج باش نجري و ممكن مالشمس عينيا تدمع و نبكي، ممكن باش نلسق العباد بالعاني و نبدى نضحك و ممكن نجمد في بلاصتي كي الشجر و بعد دقايق نخاف و نرجع و نغزر للشارع مالشباك، خممت برشا قبل ما نحط ساقي في الكياس. خفت و لبست كبوط نعرف نعرف الطقس سخون اما كان الشمس تخون و تغيب نلقى باش نتغطى و كان ايمسني حد والا اطيح عليا ورقة و الا صوابعك تتحط على يدي بالسرقة … نخاف اما ميسالش حطيت ساقي و تعديت العتبة خفت باش نتنفس لا يطلع الهواء امسخ و كل ما خطواتي تتبدل نخرج من أربعة حيوط و نخرج من خيوط العنكبوت و نخرج مالسكات و نخرج مالثبات و اي اي نخاف كي نغزر للعباد و نبعد كي حد يقربلي و نغزرلوا في عينيه و نفركس على روحي فيه و نسؤلوا خرجنا والا ما خرجناش و ميسالش ناقفوا مع بعضنا اما مالبعيد؟ و كيفاه انجموا توشوشلي في وذني من جديد؟ كيفاه نتحرك و كيفاه ندعثر و نشرق؟

خرجت و فهمت الي الشارع تبدل و انا لتوا ما لقيت بلاصة. و الي لازم نعاود حساباتي و خطواتي و كيفاه نشوف و خاصة ماعاش نمد يدي و نمس لا عباد لا ماء لا هواء و حتى وجهي لا. فهمت الي انا ماعاش حر و الي الخوف اقوى و الي انا ضعيف. فهمت الي الشارع من غيري حي و الشجر كبر و الريح و المطر، الليل و النهار و الأيام تجري و الشتاء ولاّ ربيع والربيع ولاّ صيف و انا وين

؟ انا ستانست نغزر للشارع مالشباك. و انا شكون؟ انا كيما انا بزايد خوف.

Tom Bogaert
Neural Machine Translation, vidéo from instant camera feature on Google Translate app.  Neural Machine Arabic to English translation of a text by Lilia Ben Romdhane, 04’05, Juin 2020
© tom bogaert

_______________

Balthazar Heisch
la peur ? , installation en milieu naturel, Juin 2020
© balthazar heisch

_______________

Slimen Kamel
City nearby, acrylique sur toile et assemblage, 162 x 176cm, 2019
© slimen kamel

_______________

Slimen Kamel
Lumières de médina, acrylique sur toile et assemblage, 177 x 162cm, 2019
© slimen kamel

Tom Bogaert
Neural Machine Translation 2, 00’59 min, Juillet 2020
© tom bogaert